發佈日期:

青通與潺菜

講到夏天農產,各種瓜豆當然位處討論區榜首;雖然有些農夫都會種菜芯,但一般來講葉菜還是潺菜、莧菜、通菜(夏日三寶)比較普遍。今個夏天種太少莧菜未能詳述;種得出、銷售過的只有其餘兩者。

通菜又分青通和白通,前者比後者纖幼,後者多數種水田。農場大多數農友都種青通,一來夏天食好爽口,二來難度不算高,收完又可再收,三來搞活動時都算賣得出,畢竟大家都識煮。

潺菜口感如菜名滑潺潺,其實都幾好食,不過相比青通,人們對潺菜的情感似乎比較愛恨分明。潺菜對年青人來講比較偏門,老實講,自己都是近幾年因為落田多先食,點個芝麻醬很不錯;對老一輩來講,潺菜則是煲湯好材料,加豆腐一流。

8月尾9月頭理應是轉季時候,農民開始準備秋冬季作物,早水蘿蔔也要種了,月尾都開始準備種番茄和牛奶粟。另外如果種兩茬米的農場,晚茬稻米也要在月中前插秧。將於9月初的農民市集以加工品為主打,新鮮農產品除了蕉、木瓜、苦瓜、茄子,葉菜就有夏日三寶做代表,不過數量始終會比旺季少好多。