5月運到農場的犁田機，一落地就被我拉壞盤頭，然後一直忙東忙西，就擱在農舍一段時間，它錯過了開田最忙碌的日子。
這部農友清倉時free出來的犁田機，不是常見的Honda 或Mitsubishi，也不是大陸牌子（雖然都是MIC），這部「ISKRA HG60T 」是斯洛文尼亞的品牌，超級罕見。
巴爾幹的犁田機，聽落好威，但愈罕有的型號，就代表零件愈難找，就像我們開車習慣日日揸，而且要任勞任怨，豐田是不二之選，就算有錢都不會揀歐洲車。
說在慚愧，在油麻地租Studio快一年，其實都未搞懂區內一大堆五金機械舖的分工。由快富街開始找，到碧街終於有一檔機械舖招呼我這位手持盤頭的無助小男生。
最初我話要配，兩位師傅放低架生睇完後，直言成個油麻地都唔會有人理我，冷門機型好難配，新盤頭要訂幾日、無$300走唔甩，不如我幫你整左佢啦。
於是一手就拎走盤頭埋頭苦幹，裡面食力的拉盤彈弓消失，一睇就知試過自己維修（失敗），然後再慢慢找條適合的彈弓同戒子，一整就大半個鐘。
中間發生小插曲，本身求其將車放街邊，最近抄牌太多，師傅叫不如上車等等，做好先call。剛好舖頭門口錶位有車開走，本身想倒車泊埋去，誰知被另一部車捷足先登，無癮落車，返舖頭門口等。
兩位中年西裝男人落車，經過門口，司機突然怯起上來，問係咪泊左我個位，我食飯咋，畀返你擺都得。答話唔駛後鬆一口氣，原來以為我想拎架生打爆佢玻璃。
西裝友行過後，盤頭也重新裝好，師傅堅持只肯收80（I say 100)，街坊生意，最緊要日後要買咩剪草機呀鏈鋸呀要多多關照。稍後返農場裝機，希望可以拉著。
遇到手藝好的師傅，一定要幫手賣個廣廣告：有需要買發電機、汽油機、汽油鋸，或者想維修機頭的朋友（雖然唔知有邊啲朋友有呢啲需要），不妨幫襯下碧街8號地下4號舖的「國達」，師傅手勢很好、而且超有耐性。
（昆左大家睇呢篇其實同巴爾幹唔太關事的廢文，so99y）